Dyna ichi ffaith drist. Fel Darlington, 'dyw Abertawe ond wedi sgorio tair gôl mewn wyth gêm Gynghrair ers dechrau'r tymor - a fel y tîm sydd ar waelod Yr Ail Adran , mae tîm Paulo Sousa wedi methu â sgorio mewn pump o'u gemau yn Y Gynghrair hyd yn hyn.

Mae'r record honno yn un druenus wrth gwrs, ond 'dyw perfformiadau Abertawe yn eu gemau diweddar ddim wedi bod yn druenus yn fy marn i. Wythnos i Nos Fawrth ddiwethaf 'roeddwn i yn Stadiwm Liberty yn gwylio'r gêm ddi-sgôr yn erbyn Bristol City - o Eisteddle'r Dwyrain yn hytrach nag yn sylwebu ar y gêm o Eisteddle'r Gorllewin.

Dylsai Abertawe fod wedi sgorio a gallen nhw'n hawdd fod wedi ennill; ac mae'r un peth yn wir am y gêm ddi-sgôr yn Barnsley y Sadwrn diwethaf. Mae hi'n rhyfedd meddwl petae Abertawe wedi cael buddugoliaeth yn Oakwell, eu record nhw ar ôl wyth gêm fuasai : ennill 2 cyfartal 3 colli 3 : yr un fath â'u record ar ôl wyth gêm y tymor diwethaf gyda Roberto Martinez yn rheolwr...

"Pan ddechreuwn ni sgorio, gwnawn ni sgorio llawer o goliau."

Dyna gyfieithiad o beth ddywedodd Sousa ar ôl y gêm yn Barnsley ac 'rydw i'n credu efallai ei fod o'n iawn. Mae'r chwaraewyr wedi gwastraffu cyfleoedd da o flaen y gôl yn y ddwy gêm ddiwethaf - er enghraifft Jordi Lopez yn erbyn Bristol City a Cedric van der Gun yn Barnsley - a gallai Craig Beattie fod wedi sgorio ar ôl iddo fo ddod i'r maes yn eilydd yn y ddwy gêm.

Wrth sôn am Beattie, os bydd o'n chwarae yn erbyn Sheffield United, bydd o'n benderfynol o sgorio ei gôl gyntaf i Abertawe yn eu herbyn nhw ar ôl iddo fo dreulio cyfnod ar fenthyg gyda nhw o West Brom y tymor diwethaf.