Roedd yna raglen ddifyr yn y gyfres materion cyfoes Y Byd ar Bedwar ar S4C ychydig wythnosau yn ôl.
Yn y rhaglen, roedd y gohebydd Sian Morgan yn cyflwyno adroddiad o Stadiwm y Liberty, gan edrych ar wahanol agweddau pobl Cymru at bynciau mawr trafod yn y byd pêl-droed.
Gyda 'r pêl-droediwr Cymreig mwya' disglair ein cyfnod, Gareth Bale, yn rhan o garfan Spurs heddiw, mae'n amserol i edrych eto ar ambell gasgliad a gafwyd yn y rhaglen.
Y peth mwyaf cadarnhaol oedd bod yr arolwg barn yn dangos fod Abertawe bellach ar y blaen mewn poblogrwydd i Gaerdydd a holl dimau Lloegr, gan gynnwys Tottenham Hotspurs.
Yn ôl yr arolwg barn gan YouGov, a gomisiynwyd gan raglen Y Byd ar Bedwar, mae 20% o gefnogwyr pêl-droed Cymru nawr cefnogi tîm pêl-droed Abertawe.
Mae'r arolwg hefyd yn dangos bod 18% o gefnogwyr pêl-droed yn deyrngar i Gaerdydd, tra bod 17% yn cefnogi Manchester United, ac 14% yn cefnogi Lerpwl.
Holwyd mil o bobol ledled Cymru ynglŷn â'r timau pêl-droed yr oedden nhw'n eu cefnogi, gan ddod i'r casgliad fod ychydig dros hanner cefnogwyr pêl-droed Cymru, 54%, yn cefnogi clybiau o Loegr, tra bod 44% yn cefnogi timau o Gymru.
Cafodd yr arolwg ei gynnal rhwng 16 a 18 Tachwedd, ddyddiau'n unig cyn i Abertawe wynebu Manchester United yn yr Uwch-gynghrair Barclays.
Colli o 1 gôl i 0 bu hanes yr Elyrch yn y gêm honno, ond mae eu dyrchafiad i'r Uwch-gynghrair wedi ennill llu o gefnogwyr i dîm Brendan Rodgers yn ystod eu tymor cyntaf yn yr Uwch-gynghrair.
Mae'r cyfan yn dangos cymaint y mae'r clwb wedi datblygu yn ystod y misoedd diwethaf a chymaint yw'r potensial am fwy o gynnydd a thwf.
Roedd Gareth Bale wedi dweud ar goedd amser y gêm ail gyfle ym mis Mai ei fod yn gobeithio y byddai Abertawe yn curo Reading ac yn cyrraedd yr Uwch-gynghrair.
Y gobaith yw y bydd cefnogwyr Abertawe yn cofio hynny os bydd yn chwarae heddiw ac yn peidio â rhoi amser caled iddo o'r terasus am ei fod yn dod o Gaerdydd.
Yn y gêm ryngwladol ddiwethaf, y gêm gyfeillgar yn erbyn Norwy yn Stadiwm Dinas Caerdydd, roedd rhai yn ei alw'n fradwr am ei fod wedi mynegi awydd i chwarae i dîm Pêl-droed GB.
Roedd Arolwg Y Byd ar Bedwar yn yr un rhaglen yn dangos bod 69 y cant o bobl Cymru yn credu y dylai peldroedwyr Cymru chwarae i Dîm Pêl-droed Prydain Fawr yn y Gemau Olympaidd.
Cafodd mil o bobol eu holi am greu tîm pêl-droed unedig i Brydain Fawr ar gyfer Gemau Olympaidd Llundain, a dim ond 10% o'r rhai a holwyd oedd yn erbyn gweld chwaraewyr Cymru yn ymuno â'r tîm.
Ddeufis yn ôl, fe gyhoeddodd Aaron Ramsey, Capten Cymru, a Gareth Bale, Chwaraewr y Flwyddyn Cymru, eu bod ill dau yn awyddus i ymuno â 'Tîm GB' ar gyfer twrnament pêl-droed y Gemau Olympaidd.
Mae'r cyhoeddiad gan y ddau wedi cael ei feirniadu'n hallt gan nifer o gefnogwyr, am ystyried cymryd cam a allai, yn ôl Cymdeithas Bêl-droed Cymru, gyfaddawdu annibyniaeth y tîm cenedlaethol.
Yn bersonol, dwi ddim yn awyddus iawn iddynt ymuno â Thîm GB - ond dwi ddim yn meddwl y dylai beryglu ein statws fel tîm cenedlaethol gan fod gennym Uwch-gynghrair ein hunain.
Rwy'n credu taw dewis personol yw e' ac nad yw'n teilyngu protestio yn eu herbyn os dyna yw eu penderfyniad.
Ond dwi ddim yn deall chwaith pam y byddan nhw'n dymuno gwneud ac mae doethach fyddai canolbwyntio ar chwarae i'w clybiau ac i Gymru yr haf nesaf.
Fel dywedodd cyn Alarch, yr athletwr Dai Greene, llwyfan i'r campau eraill yw'r Gemau Olympaidd. Mae gan bêl-droed ei chystadleuaeth ei hun, Cwpan y Byd.
Mae Gareth Bale yn chwaraewr o ddawn ryfeddol ac yn lifrau Spurs neu Gymru y dylwn ei weld. Gobeithio na welwn ormod o'i ddisgleirdeb heddiw yn ein herbyn ni ond y bydd ar dân pan fydd ymgyrch Cymru'n dechrau fis Medi nesa'.
